Fitatcen Jarumin Arewacin Najeriya Adam A Zango ya Kara daka tsallen ficewa daga masana’antar fim din Arewacin Nigeria ya koma garin Legas da harkokin sa na wake-wake, bayan ficewarsa daga masana’antar fim ta Kannywood inda ya koma cin gashin kansa.
Jaridar Aminiya ce ta bayyana cewa Jaruman ya yi hijira zuwa garin legas da zama tare da kuma maida duk harkokin sa can kudancin Najeriya saboda rashin mamora da ta rage a masana’antar fim ta Hausa sai zalinci da sharri da kuma ci masa mutunci da a ke yi.
A watannin da su ka gabata ne dai Adam A Zango ya bayyana ficewarsa daga masana’antar Kannywood sakamakon hatsaniya da a ke zargin ta shiga tsakanin sa da hukuma tace fina-finai da Dab’i ta Jihar Kano. Tun a wancan lokacin Jarumin ya mayar da hankalinsa wajen yin wakokinsa da finafinai a matsayin sa na ba dan Kannywood ba.
Bayan ficewarsa daga Kannywood, Adam Zango ya fito da wata kafar yanar gizo a kan dandalin youtube domin tallata finafinan sa a duniya, inda ya ke karbar Naira Dubu guda a wajen masu sha’awar fim din sa wanda daga bisani ya ke turawa wadanda su ka biya kudi sakon samun shiga dandalin fim din na sa. Wannan kafar kasuwanci ta Adamu dai ya nade ta ne da Allah ya isa, inda ya yiwa wasu da ya ce sun yi masa kutsen kallon fim din sa ba tare da sun biya kudi ba.
A wannan sabuwar hijirar ta Adam Zango zuwa garin Ikko ya bayyanata ne a faifan bidiyo inda ya ke jaddadawa masoyan sa cewa “Ni yanzu ma na tattara na koma jihar legas da zama don na ci gaba da sabgogina, idan kun ganni a arewacin Najeriya waka nazo yi ko biki ko kuma wani abu da a ka gayyace ni idan kuma na gama na dawo. Amma ba fim ba kuma duk wanda ya ke masana’antar Kannywood ya san cewa ni yanzu ba Dan fim ba ne.” Inji Adam A Zango
To ko dai Adamu ya bi sahun abokan sana’arsa ne da ke gogayya a masana’antar finafinai ta Nollywood irin su Yakubu Muhammed da Sani Danger da su ke finafinai da wakokin turanci?
#NorthFlix
The post Waka Ko Fim Adam A Zango Ya Koma Yi Legas appeared first on ArewaBlog. NG™.
Comments
Post a Comment